1 Crônicas 18

¹א ויהי אחרי כן ויך דויד את פלשתים ויכניעם ויקח את גת ובנתיה מיד פלשתים

²ב ויך את מואב ויהיו מואב עבדים לדויד נשאי מנחה

³ג ויך דויד את הדדעזר מלך צובה חמתה בלכתו להציב ידו בנהר פרת

⁴ד וילכד דויד ממנו אלף רכב ושבעת אלפים פרשים ועשרים אלף איש רגלי ויעקר דויד את כל הרכב ויותר ממנו מאה רכב

⁵ה ויבא ארם דרמשק לעזור להדדעזר מלך צובה ויך דויד בארם עשרים ושנים אלף איש

⁶ו וישם דויד בארם דרמשק ויהי ארם לדויד עבדים נשאי מנחה ויושע יהוה לדויד בכל אשר הלך

⁷ז ויקח דויד את שלטי הזהב אשר היו על עבדי הדדעזר ויביאם ירושלם

⁸ח ומטבחת ומכון ערי הדדעזר לקח דויד נחשת רבה מאד בה עשה שלמה את ים הנחשת ואת העמודים ואת כלי הנחשת  {פ}

⁹ט וישמע תעו מלך חמת  כי הכה דויד את כל חיל הדדעזר מלך צובה

¹⁰י וישלח את הדורם בנו אל המלך דויד לשאול (לשאל) לו לשלום ולברכו על אשר נלחם בהדדעזר ויכהו--כי איש מלחמות תעו היה הדדעזר וכל כלי זהב וכסף--ונחשת

¹¹יא גם אתם הקדיש המלך דויד ליהוה עם הכסף והזהב אשר נשא מכל הגוים--מאדום וממואב ומבני עמון ומפלשתים ומעמלק

¹²יב ואבשי בן צרויה הכה את אדום בגיא המלח שמונה עשר אלף

¹³יג וישם באדום נציבים ויהיו כל אדום עבדים לדויד ויושע יהוה את דויד בכל אשר הלך

¹⁴יד וימלך דויד על כל ישראל ויהי עשה משפט וצדקה--לכל עמו

¹⁵טו ויואב בן צרויה על הצבא ויהושפט בן אחילוד מזכיר

¹⁶טז וצדוק בן אחיטוב ואבימלך בן אביתר כהנים ושושא סופר

¹⁷יז ובניהו בן יהוידע על הכרתי והפלתי ובני דויד הראשנים ליד המלך  {פ}