1 Crônicas 23

¹א ודויד זקן ושבע ימים וימלך את שלמה בנו על ישראל

²ב ויאסף את כל שרי ישראל והכהנים והלוים

³ג ויספרו הלוים מבן שלשים שנה ומעלה ויהי מספרם לגלגלתם לגברים שלשים ושמונה אלף

⁴ד מאלה לנצח על מלאכת בית יהוה עשרים וארבעה אלף ושטרים ושפטים ששת אלפים

⁵ה וארבעת אלפים שערים וארבעת אלפים מהללים ליהוה בכלים אשר עשיתי להלל  {ס}

⁶ו ויחלקם דויד מחלקות  {ס}  לבני לוי לגרשון קהת ומררי  {ס}

⁷ז לגרשני לעדן ושמעי  {ס}

⁸ח בני לעדן הראש יחיאל וזתם ויואל--שלשה  {ס}

⁹ט בני שמעי שלמות (שלמית) וחזיאל והרן--שלשה אלה ראשי האבות ללעדן  {ס}

¹⁰י ובני שמעי--יחת זינא ויעוש ובריעה אלה בני שמעי ארבעה

¹¹יא ויהי יחת הראש וזיזה השני ויעוש ובריעה לא הרבו בנים ויהיו לבית אב לפקדה אחת  {ס}

¹²יב בני קהת עמרם יצהר חברון ועזיאל--ארבעה  {ס}

¹³יג בני עמרם אהרן ומשה ויבדל אהרן להקדישו קדש קדשים הוא ובניו עד עולם--להקטיר לפני יהוה לשרתו ולברך בשמו עד עולם

¹⁴יד ומשה איש האלהים--בניו יקראו על שבט הלוי  {ס}

¹⁵טו בני משה גרשום ואליעזר

¹⁶טז בני גרשום שבואל הראש

¹⁷יז ויהיו בני אליעזר רחביה הראש ולא היה לאליעזר בנים אחרים ובני רחביה רבו למעלה  {ס}

¹⁸יח בני יצהר שלמית הראש

¹⁹יט בני חברון--יריהו הראש אמריה השני יחזיאל השלישי ויקמעם הרביעי

²⁰כ בני עזיאל--מיכה הראש וישיה השני

²¹כא בני מררי מחלי ומושי בני מחלי אלעזר וקיש

²²כב וימת אלעזר ולא היו לו בנים כי אם בנות וישאום בני קיש אחיהם

²³כג בני מושי מחלי ועדר וירמות--שלושה  {ס}

²⁴כד אלה בני לוי לבית אבותיהם ראשי האבות לפקודיהם במספר שמות לגלגלתם עשה המלאכה לעבדת בית יהוה--מבן עשרים שנה ומעלה

²⁵כה כי אמר דויד הניח יהוה אלהי ישראל לעמו וישכן בירושלם עד לעולם

²⁶כו וגם ללוים--אין לשאת את המשכן ואת כל כליו לעבדתו

²⁷כז כי בדברי דויד האחרונים המה מספר בני לוי מבן עשרים שנה ולמעלה

²⁸כח כי מעמדם ליד בני אהרן לעבדת בית יהוה על החצרות ועל הלשכות ועל טהרת לכל קדש--ומעשה עבדת בית האלהים

²⁹כט וללחם המערכת ולסלת למנחה ולרקיקי המצות ולמחבת ולמרבכת ולכל משורה ומדה

³⁰ל ולעמד בבקר בבקר להדות ולהלל ליהוה וכן לערב

³¹לא ולכל העלות עלות ליהוה לשבתות לחדשים ולמעדים--במספר כמשפט עליהם תמיד לפני יהוה

³²לב ושמרו את משמרת אהל מועד ואת משמרת הקדש ומשמרת בני אהרן אחיהם--לעבדת בית יהוה  {פ}