1 Crônicas 9

¹א וכל ישראל התיחשו והנם כתובים על ספר מלכי ישראל ויהודה הגלו לבבל במעלם  {ס}

²ב והיושבים הראשנים אשר באחזתם בעריהם  ישראל הכהנים הלוים והנתינים

³ג ובירושלם ישבו מן בני יהודה ומן בני בנימן--ומן בני אפרים ומנשה

⁴ד עותי בן עמיהוד בן עמרי בן אמרי בן בנימן (בני מן) בני פרץ בן יהודה  {ס}

⁵ה ומן השילוני עשיה הבכור ובניו

⁶ו ומן בני זרח יעואל ואחיהם שש מאות ותשעים

⁷ז ומן בני בנימן--סלוא בן משלם בן הודויה בן הסנאה

⁸ח ויבניה בן ירחם ואלה בן עזי בן מכרי ומשלם בן שפטיה בן רעואל בן יבניה

⁹ט ואחיהם לתלדותם תשע מאות וחמשים וששה כל אלה אנשים ראשי אבות לבית אבתיהם  {ס}

¹⁰י ומן הכהנים  ידעיה ויהויריב ויכין

¹¹יא ועזריה בן חלקיה בן משלם בן צדוק בן מריות בן אחיטוב נגיד בית האלהים  {ס}

¹²יב ועדיה בן ירחם בן פשחור בן מלכיה ומעשי בן עדיאל בן יחזרה בן משלם בן משלמית בן אמר

¹³יג ואחיהם ראשים לבית אבותם אלף ושבע מאות וששים--גבורי חיל מלאכת עבודת בית האלהים

¹⁴יד ומן הלוים  שמעיה בן חשוב בן עזריקם בן חשביה מן בני מררי

¹⁵טו ובקבקר חרש וגלל ומתניה בן מיכא בן זכרי בן אסף

¹⁶טז ועבדיה בן שמעיה בן גלל בן ידותון וברכיה בן אסא בן אלקנה היושב בחצרי נטופתי

¹⁷יז והשערים שלום ועקוב וטלמן ואחימן ואחיהם שלום הראש

¹⁸יח ועד הנה בשער המלך מזרחה המה השערים למחנות בני לוי

¹⁹יט ושלום בן קורא בן אביסף בן קרח ואחיו לבית אביו הקרחים על מלאכת העבודה שמרי הספים לאהל ואבתיהם על מחנה יהוה שמרי המבוא

²⁰כ ופינחס בן אלעזר נגיד היה עליהם לפנים--יהוה עמו

²¹כא זכריה בן משלמיה שער פתח לאהל מועד

²²כב כלם הברורים לשערים בספים מאתים ושנים עשר המה בחצריהם התיחשם המה יסד דויד ושמואל הראה באמונתם

²³כג והם ובניהם על השערים לבית יהוה לבית האהל--למשמרות

²⁴כד לארבע רוחות יהיו השערים  מזרח ימה צפונה ונגבה

²⁵כה ואחיהם בחצריהם לבוא לשבעת הימים מעת אל עת--עם אלה

²⁶כו כי באמונה המה ארבעת גברי השערים--הם הלוים והיו על הלשכות ועל האצרות בית האלהים

²⁷כז וסביבות בית האלהים ילינו  כי עליהם משמרת והם על המפתח ולבקר לבקר

²⁸כח ומהם על כלי העבודה  כי במספר יביאום ובמספר יוציאום

²⁹כט ומהם ממנים על הכלים ועל כל כלי הקדש ועל הסלת והיין והשמן והלבונה והבשמים

³⁰ל ומן בני הכהנים רקחי המרקחת לבשמים

³¹לא ומתתיה מן הלוים הוא הבכור לשלם הקרחי--באמונה על מעשה החבתים

³²לב ומן בני הקהתי מן אחיהם על לחם המערכת להכין שבת שבת

³³לג ואלה המשררים ראשי אבות ללוים בלשכת--פטירים (פטורים)  כי יומם ולילה עליהם במלאכה

³⁴לד אלה ראשי האבות ללוים לתלדותם ראשים אלה ישבו בירושלם  {ס}

³⁵לה ובגבעון ישבו אבי גבעון יעואל (יעיאל) ושם אשתו מעכה

³⁶לו ובנו הבכור עבדון וצור וקיש ובעל ונר ונדב

³⁷לז וגדור ואחיו וזכריה ומקלות

³⁸לח ומקלות הוליד את שמאם ואף הם נגד אחיהם ישבו בירושלם--עם אחיהם  {ס}

³⁹לט ונר הוליד את קיש וקיש הוליד את שאול ושאול הוליד את יהונתן ואת מלכישוע ואת אבינדב ואת אשבעל

⁴⁰מ ובן יהונתן מריב בעל ומרי בעל הוליד את מיכה

⁴¹מא ובני מיכה--פיתן ומלך ותחרע

⁴²מב ואחז הוליד את יערה ויערה הוליד את עלמת ואת עזמות ואת זמרי וזמרי הוליד את מוצא

⁴³מג ומוצא הוליד את בנעא ורפיה בנו אלעשה בנו אצל בנו

⁴⁴מד ולאצל ששה בנים ואלה שמותם עזריקם בכרו וישמעאל ושעריה ועבדיה וחנן אלה בני אצל  {פ}