1 Reis 4

¹א ויהי המלך שלמה מלך על כל ישראל  {ס}

²ב ואלה השרים אשר לו  עזריהו בן צדוק הכהן  {ס}

³ג אליחרף ואחיה בני שישא ספרים  {ס}  יהושפט בן אחילוד המזכיר  {ס}

⁴ד ובניהו בן יהוידע על הצבא  {ס}  וצדוק ואביתר כהנים  {ס}

⁵ה ועזריהו בן נתן על הנצבים  {ס}  וזבוד בן נתן כהן רעה המלך  {ס}

⁶ו ואחישר על הבית  {ס}  ואדנירם בן עבדא על המס  {ס}

⁷ז ולשלמה שנים עשר נצבים על כל ישראל וכלכלו את המלך ואת ביתו  חדש בשנה יהיה על אחד (האחד) לכלכל  {ס}

⁸ח ואלה שמותם בן חור בהר אפרים  {ס}

⁹ט בן דקר במקץ ובשעלבים ובית שמש ואילון בית חנן  {ס}

¹⁰י בן חסד בארבות לו שכה וכל ארץ חפר  {ס}

¹¹יא בן אבינדב כל נפת דאר טפת בת שלמה היתה לו לאשה  {ס}

¹²יב בענא בן אחילוד תענך ומגדו וכל בית שאן אשר אצל צרתנה מתחת ליזרעאל מבית שאן עד אבל מחולה עד מעבר ליקמעם  {ס}

¹³יג בן גבר ברמת גלעד לו חות יאיר בן מנשה אשר בגלעד לו חבל ארגב אשר בבשן--ששים ערים גדלות חומה ובריח נחשת  {ס}

¹⁴יד אחינדב בן עדא מחנימה  {ס}

¹⁵טו אחימעץ בנפתלי גם הוא לקח את בשמת בת שלמה--לאשה  {ס}

¹⁶טז בענא בן חושי באשר ובעלות  {ס}

¹⁷יז יהושפט בן פרוח ביששכר  {ס}

¹⁸יח שמעי בן אלא בבנימן  {ס}

¹⁹יט גבר בן ארי בארץ גלעד--ארץ סיחון מלך האמרי ועג מלך הבשן ונציב אחד אשר בארץ

²⁰כ יהודה וישראל רבים כחול אשר על הים לרב אכלים ושתים ושמחים