Daniel 12

¹א ובעת ההיא יעמד מיכאל השר הגדול העמד על בני עמך והיתה עת צרה אשר לא נהיתה מהיות גוי עד העת ההיא ובעת ההיא ימלט עמך כל הנמצא כתוב בספר

²ב ורבים מישני אדמת עפר יקיצו אלה לחיי עולם ואלה לחרפות לדראון עולם  {ס}

³ג והמשכלים--יזהרו כזהר הרקיע ומצדיקי הרבים ככוכבים לעולם ועד  {פ}

⁴ד ואתה דניאל סתם הדברים וחתם הספר--עד עת קץ ישטטו רבים ותרבה הדעת

⁵ה וראיתי אני דניאל והנה שנים אחרים עמדים  אחד הנה לשפת היאר ואחד הנה לשפת היאר

⁶ו ויאמר לאיש לבוש הבדים אשר ממעל למימי היאר  עד מתי קץ הפלאות

⁷ז ואשמע את האיש לבוש הבדים אשר ממעל למימי היאר וירם ימינו ושמאלו אל השמים וישבע בחי העולם  כי למועד מועדים וחצי וככלות נפץ יד עם קדש--תכלינה כל אלה

⁸ח ואני שמעתי ולא אבין ואמרה--אדני מה אחרית אלה  {פ}

⁹ט ויאמר לך דניאל  כי סתמים וחתמים הדברים עד עת קץ

¹⁰י יתבררו ויתלבנו ויצרפו רבים והרשיעו רשעים ולא יבינו כל רשעים והמשכלים יבינו

¹¹יא ומעת הוסר התמיד ולתת שקוץ שמם--ימים אלף מאתים ותשעים

¹²יב אשרי המחכה ויגיע  לימים--אלף שלש מאות שלשים וחמשה

¹³יג ואתה לך לקץ ותנוח ותעמד לגרלך לקץ הימין  {ש}