Deuteronômio 33

¹א וזאת הברכה אשר ברך משה איש האלהים--את בני ישראל  לפני מותו

²ב ויאמר יהוה מסיני בא וזרח משעיר למו--הופיע מהר פארן ואתה מרבבת קדש מימינו אשדת (אש דת) למו

³ג אף חבב עמים כל קדשיו בידך והם תכו לרגלך ישא מדברתיך

⁴ד תורה צוה לנו משה  מורשה קהלת יעקב

⁵ה ויהי בישרון מלך בהתאסף ראשי עם יחד שבטי ישראל

⁶ו יחי ראובן ואל ימת ויהי מתיו מספר  {ס}

⁷ז וזאת ליהודה ויאמר שמע יהוה קול יהודה ואל עמו תביאנו ידיו רב לו ועזר מצריו תהיה  {פ}

⁸ח וללוי אמר תמיך ואוריך לאיש חסידך אשר נסיתו במסה תריבהו על מי מריבה

⁹ט האמר לאביו ולאמו לא ראיתיו ואת אחיו לא הכיר ואת בנו לא ידע  כי שמרו אמרתך ובריתך ינצרו

¹⁰י יורו משפטיך ליעקב ותורתך לישראל ישימו קטורה באפך וכליל על מזבחך

¹¹יא ברך יהוה חילו ופעל ידיו תרצה מחץ מתנים קמיו ומשנאיו מן יקומון  {ס}

¹²יב לבנימן אמר--ידיד יהוה ישכן לבטח עליו חפף עליו כל היום ובין כתפיו שכן  {ס}

¹³יג וליוסף אמר מברכת יהוה ארצו ממגד שמים מטל ומתהום רבצת תחת

¹⁴יד וממגד תבואת שמש וממגד גרש ירחים

¹⁵טו ומראש הררי קדם וממגד גבעות עולם

¹⁶טז וממגד ארץ ומלאה ורצון שכני סנה תבואתה לראש יוסף ולקדקד נזיר אחיו

¹⁷יז בכור שורו הדר לו וקרני ראם קרניו--בהם עמים ינגח יחדו אפסי ארץ והם רבבות אפרים והם אלפי מנשה  {ס}

¹⁸יח ולזבולן אמר שמח זבולן בצאתך ויששכר באהליך

¹⁹יט עמים הר יקראו--שם יזבחו זבחי צדק  כי שפע ימים יינקו ושפני טמוני חול  {ס}

²⁰כ ולגד אמר ברוך מרחיב גד  כלביא שכן וטרף זרוע אף קדקד

²¹כא וירא ראשית לו כי שם חלקת מחקק ספון ויתא ראשי עם--צדקת יהוה עשה ומשפטיו עם ישראל  {ס}

²²כב ולדן אמר דן גור אריה יזנק מן הבשן

²³כג ולנפתלי אמר--נפתלי שבע רצון ומלא ברכת יהוה ים ודרום ירשה  {ס}

²⁴כד ולאשר אמר ברוך מבנים אשר יהי רצוי אחיו וטבל בשמן רגלו

²⁵כה ברזל ונחשת מנעלך וכימיך דבאך

²⁶כו אין כאל ישרון  רכב שמים בעזרך ובגאותו שחקים

²⁷כז מענה אלהי קדם ומתחת זרעת עולם ויגרש מפניך אויב ויאמר השמד

²⁸כח וישכן ישראל בטח בדד עין יעקב אל ארץ דגן ותירוש אף שמיו יערפו טל

²⁹כט אשריך ישראל מי כמוך עם נושע ביהוה מגן עזרך ואשר חרב גאותך ויכחשו איביך לך ואתה על במותימו תדרך  {ס}