Êxodo 23

¹א לא תשא שמע שוא אל תשת ידך עם רשע להית עד חמס

²ב לא תהיה אחרי רבים לרעת ולא תענה על רב לנטת אחרי רבים--להטת

³ג ודל לא תהדר בריבו  {ס}

⁴ד כי תפגע שור איבך או חמרו--תעה  השב תשיבנו לו  {ס}

⁵ה כי תראה חמור שנאך רבץ תחת משאו וחדלת מעזב לו--עזב תעזב עמו  {ס}

⁶ו לא תטה משפט אבינך בריבו

⁷ז מדבר שקר תרחק ונקי וצדיק אל תהרג כי לא אצדיק רשע

⁸ח ושחד לא תקח  כי השחד יעור פקחים ויסלף דברי צדיקים

⁹ט וגר לא תלחץ ואתם ידעתם את נפש הגר--כי גרים הייתם בארץ מצרים

¹⁰י ושש שנים תזרע את ארצך ואספת את תבואתה

¹¹יא והשביעת תשמטנה ונטשתה ואכלו אביני עמך ויתרם תאכל חית השדה כן תעשה לכרמך לזיתך

¹²יב ששת ימים תעשה מעשיך וביום השביעי תשבת--למען ינוח שורך וחמרך וינפש בן אמתך והגר

¹³יג ובכל אשר אמרתי אליכם תשמרו ושם אלהים אחרים לא תזכירו לא ישמע על פיך

¹⁴יד שלש רגלים תחג לי בשנה

¹⁵טו את חג המצות תשמר--שבעת ימים תאכל מצות כאשר צויתך למועד חדש האביב כי בו יצאת ממצרים ולא יראו פני ריקם

¹⁶טז וחג הקציר בכורי מעשיך אשר תזרע בשדה וחג האסף בצאת השנה באספך את מעשיך מן השדה

¹⁷יז שלש פעמים בשנה--יראה כל זכורך אל פני האדן יהוה

¹⁸יח לא תזבח על חמץ דם זבחי ולא ילין חלב חגי עד בקר

¹⁹יט ראשית בכורי אדמתך תביא בית יהוה אלהיך לא תבשל גדי בחלב אמו  {פ}

²⁰כ הנה אנכי שלח מלאך לפניך לשמרך בדרך ולהביאך אל המקום אשר הכנתי

²¹כא השמר מפניו ושמע בקלו אל תמר בו  כי לא ישא לפשעכם כי שמי בקרבו

²²כב כי אם שמוע תשמע בקלו ועשית כל אשר אדבר--ואיבתי את איביך וצרתי את צרריך

²³כג כי ילך מלאכי לפניך והביאך אל האמרי והחתי והפרזי והכנעני החוי והיבוסי והכחדתיו

²⁴כד לא תשתחוה לאלהיהם ולא תעבדם ולא תעשה כמעשיהם  כי הרס תהרסם ושבר תשבר מצבתיהם

²⁵כה ועבדתם את יהוה אלהיכם וברך את לחמך ואת מימיך והסרתי מחלה מקרבך  {ס}

²⁶כו לא תהיה משכלה ועקרה בארצך את מספר ימיך אמלא

²⁷כז את אימתי אשלח לפניך והמתי את כל העם אשר תבא בהם ונתתי את כל איביך אליך ערף

²⁸כח ושלחתי את הצרעה לפניך וגרשה את החוי את הכנעני ואת החתי--מלפניך

²⁹כט לא אגרשנו מפניך בשנה אחת  פן תהיה הארץ שממה ורבה עליך חית השדה

³⁰ל מעט מעט אגרשנו מפניך עד אשר תפרה ונחלת את הארץ

³¹לא ושתי את גבלך מים סוף ועד ים פלשתים וממדבר עד הנהר  כי אתן בידכם את ישבי הארץ וגרשתמו מפניך

³²לב לא תכרת להם ולאלהיהם ברית

³³לג לא ישבו בארצך פן יחטיאו אתך לי  כי תעבד את אלהיהם כי יהיה לך למוקש  {פ}