Êxodo 25

¹א וידבר יהוה אל משה לאמר

²ב דבר אל בני ישראל ויקחו לי תרומה  מאת כל איש אשר ידבנו לבו תקחו את תרומתי

³ג וזאת התרומה אשר תקחו מאתם  זהב וכסף ונחשת

⁴ד ותכלת וארגמן ותולעת שני ושש ועזים

⁵ה וערת אילם מאדמים וערת תחשים ועצי שטים

⁶ו שמן למאר בשמים לשמן המשחה ולקטרת הסמים

⁷ז אבני שהם ואבני מלאים לאפד ולחשן

⁸ח ועשו לי מקדש ושכנתי בתוכם

⁹ט ככל אשר אני מראה אותך את תבנית המשכן ואת תבנית כל כליו וכן תעשו  {ס}

¹⁰י ועשו ארון עצי שטים  אמתים וחצי ארכו ואמה וחצי רחבו ואמה וחצי קמתו

¹¹יא וצפית אתו זהב טהור מבית ומחוץ תצפנו ועשית עליו זר זהב סביב

¹²יב ויצקת לו ארבע טבעת זהב ונתתה על ארבע פעמתיו ושתי טבעת על צלעו האחת ושתי טבעת על צלעו השנית

¹³יג ועשית בדי עצי שטים וצפית אתם זהב

¹⁴יד והבאת את הבדים בטבעת על צלעת הארן לשאת את הארן בהם

¹⁵טו בטבעת הארן יהיו הבדים  לא יסרו ממנו

¹⁶טז ונתת אל הארן--את העדת אשר אתן אליך

¹⁷יז ועשית כפרת זהב טהור  אמתים וחצי ארכה ואמה וחצי רחבה

¹⁸יח ועשית שנים כרבים זהב מקשה תעשה אתם משני קצות הכפרת

¹⁹יט ועשה כרוב אחד מקצה מזה וכרוב אחד מקצה מזה מן הכפרת תעשו את הכרבים על שני קצותיו

²⁰כ והיו הכרבים פרשי כנפים למעלה סככים בכנפיהם על הכפרת ופניהם איש אל אחיו אל הכפרת--יהיו פני הכרבים

²¹כא ונתת את הכפרת על הארן מלמעלה ואל הארן--תתן את העדת אשר אתן אליך

²²כב ונועדתי לך שם ודברתי אתך מעל הכפרת מבין שני הכרבים אשר על ארון העדת--את כל אשר אצוה אותך אל בני ישראל  {פ}

²³כג ועשית שלחן עצי שטים  אמתים ארכו ואמה רחבו ואמה וחצי קמתו

²⁴כד וצפית אתו זהב טהור ועשית לו זר זהב סביב

²⁵כה ועשית לו מסגרת טפח סביב ועשית זר זהב למסגרתו סביב

²⁶כו ועשית לו ארבע טבעת זהב ונתת את הטבעת על ארבע הפאת אשר לארבע רגליו

²⁷כז לעמת המסגרת תהיין הטבעת--לבתים לבדים לשאת את השלחן

²⁸כח ועשית את הבדים עצי שטים וצפית אתם זהב ונשא בם את השלחן

²⁹כט ועשית קערתיו וכפתיו וקשותיו ומנקיתיו אשר יסך בהן זהב טהור תעשה אתם

³⁰ל ונתת על השלחן לחם פנים לפני תמיד  {פ}

³¹לא ועשית מנרת זהב טהור מקשה תעשה המנורה ירכה וקנה גביעיה כפתריה ופרחיה ממנה יהיו

³²לב וששה קנים יצאים מצדיה  שלשה קני מנרה מצדה האחד ושלשה קני מנרה מצדה השני

³³לג שלשה גבעים משקדים בקנה האחד כפתר ופרח ושלשה גבעים משקדים בקנה האחד כפתר ופרח כן לששת הקנים היצאים מן המנרה

³⁴לד ובמנרה ארבעה גבעים  משקדים--כפתריה ופרחיה

³⁵לה וכפתר תחת שני הקנים ממנה וכפתר תחת שני הקנים ממנה וכפתר תחת שני הקנים ממנה--לששת הקנים היצאים מן המנרה

³⁶לו כפתריהם וקנתם ממנה יהיו כלה מקשה אחת זהב טהור

³⁷לז ועשית את נרתיה שבעה והעלה את נרתיה והאיר על עבר פניה

³⁸לח ומלקחיה ומחתתיה זהב טהור

³⁹לט ככר זהב טהור יעשה אתה--את כל הכלים האלה

⁴⁰מ וראה ועשה  בתבניתם--אשר אתה מראה בהר  {ס}