Êxodo 30

¹א ועשית מזבח מקטר קטרת עצי שטים תעשה אתו

²ב אמה ארכו ואמה רחבו רבוע יהיה ואמתים קמתו ממנו קרנתיו

³ג וצפית אתו זהב טהור את גגו ואת קירתיו סביב--ואת קרנתיו ועשית לו זר זהב סביב

⁴ד ושתי טבעת זהב תעשה לו מתחת לזרו על שתי צלעתיו--תעשה על שני צדיו והיה לבתים לבדים לשאת אתו בהמה

⁵ה ועשית את הבדים עצי שטים וצפית אתם זהב

⁶ו ונתתה אתו לפני הפרכת אשר על ארן העדת--לפני הכפרת אשר על העדת אשר אועד לך שמה

⁷ז והקטיר עליו אהרן קטרת סמים בבקר בבקר בהיטיבו את הנרת--יקטירנה

⁸ח ובהעלת אהרן את הנרת בין הערבים יקטירנה--קטרת תמיד לפני יהוה לדרתיכם

⁹ט לא תעלו עליו קטרת זרה ועלה ומנחה ונסך לא תסכו עליו

¹⁰י וכפר אהרן על קרנתיו אחת בשנה  מדם חטאת הכפרים אחת בשנה יכפר עליו לדרתיכם--קדש קדשים הוא ליהוה  {פ}

¹¹יא וידבר יהוה אל משה לאמר

¹²יב כי תשא את ראש בני ישראל לפקדיהם ונתנו איש כפר נפשו ליהוה בפקד אתם ולא יהיה בהם נגף בפקד אתם

¹³יג זה יתנו כל העבר על הפקדים--מחצית השקל בשקל הקדש  עשרים גרה השקל--מחצית השקל תרומה ליהוה

¹⁴יד כל העבר על הפקדים מבן עשרים שנה ומעלה--יתן תרומת יהוה

¹⁵טו העשיר לא ירבה והדל לא ימעיט ממחצית השקל--לתת את תרומת יהוה לכפר על נפשתיכם

¹⁶טז ולקחת את כסף הכפרים מאת בני ישראל ונתת אתו על עבדת אהל מועד והיה לבני ישראל לזכרון לפני יהוה לכפר על נפשתיכם  {פ}

¹⁷יז וידבר יהוה אל משה לאמר

¹⁸יח ועשית כיור נחשת וכנו נחשת--לרחצה ונתת אתו בין אהל מועד ובין המזבח ונתת שמה מים

¹⁹יט ורחצו אהרן ובניו ממנו את ידיהם ואת רגליהם

²⁰כ בבאם אל אהל מועד ירחצו מים--ולא ימתו או בגשתם אל המזבח לשרת להקטיר אשה ליהוה

²¹כא ורחצו ידיהם ורגליהם ולא ימתו והיתה להם חק עולם לו ולזרעו לדרתם  {פ}

²²כב וידבר יהוה אל משה לאמר

²³כג ואתה קח לך בשמים ראש מר דרור חמש מאות וקנמן בשם מחציתו חמשים ומאתים וקנה בשם חמשים ומאתים

²⁴כד וקדה חמש מאות בשקל הקדש ושמן זית הין

²⁵כה ועשית אתו שמן משחת קדש--רקח מרקחת מעשה רקח שמן משחת קדש יהיה

²⁶כו ומשחת בו את אהל מועד ואת ארון העדת

²⁷כז ואת השלחן ואת כל כליו ואת המנרה ואת כליה ואת מזבח הקטרת

²⁸כח ואת מזבח העלה ואת כל כליו ואת הכיר ואת כנו

²⁹כט וקדשת אתם והיו קדש קדשים כל הנגע בהם יקדש

³⁰ל ואת אהרן ואת בניו תמשח וקדשת אתם לכהן לי

³¹לא ואל בני ישראל תדבר לאמר  שמן משחת קדש יהיה זה לי--לדרתיכם

³²לב על בשר אדם לא ייסך ובמתכנתו לא תעשו כמהו קדש הוא קדש יהיה לכם

³³לג איש אשר ירקח כמהו ואשר יתן ממנו על זר--ונכרת מעמיו  {ס}

³⁴לד ויאמר יהוה אל משה קח לך סמים נטף ושחלת וחלבנה סמים ולבנה זכה  בד בבד יהיה

³⁵לה ועשית אתה קטרת רקח מעשה רוקח ממלח טהור קדש

³⁶לו ושחקת ממנה הדק ונתתה ממנה לפני העדת באהל מועד אשר אועד לך שמה קדש קדשים תהיה לכם

³⁷לז והקטרת אשר תעשה--במתכנתה לא תעשו לכם קדש תהיה לך ליהוה

³⁸לח איש אשר יעשה כמוה להריח בה--ונכרת מעמיו  {ס}