Ezequiel 35

¹א ויהי דבר יהוה אלי לאמר

²ב בן אדם שים פניך על הר שעיר והנבא עליו

³ג ואמרת לו כה אמר אדני יהוה הנני אליך הר שעיר ונטיתי ידי עליך ונתתיך שממה ומשמה

⁴ד עריך חרבה אשים ואתה שממה תהיה וידעת כי אני יהוה

⁵ה יען היות לך איבת עולם ותגר את בני ישראל על ידי חרב--בעת אידם בעת עון קץ

⁶ו לכן חי אני נאם אדני יהוה כי לדם אעשך ודם ירדפך אם לא דם שנאת ודם ירדפך

⁷ז ונתתי את הר שעיר לשממה ושממה והכרתי ממנו עבר ושב

⁸ח ומלאתי את הריו חלליו גבעותיך וגיאותיך וכל אפיקיך חללי חרב יפלו בהם

⁹ט שממות עולם אתנך ועריך לא תישבנה (תשובנה) וידעתם כי אני יהוה

¹⁰י יען אמרך את שני הגוים ואת שתי הארצות לי תהיינה--וירשנוה ויהוה שם היה  {ס}

¹¹יא לכן חי אני נאם אדני יהוה ועשיתי כאפך וכקנאתך אשר עשיתה משנאתיך בם ונודעתי בם כאשר אשפטך

¹²יב וידעת כי אני יהוה שמעתי את כל נאצותיך אשר אמרת על הרי ישראל לאמר שממה (שממו)  לנו נתנו לאכלה

¹³יג ותגדילו עלי בפיכם והעתרתם עלי דבריכם  אני שמעתי  {ס}

¹⁴יד כה אמר אדני יהוה  כשמח כל הארץ שממה אעשה לך

¹⁵טו כשמחתך לנחלת בית ישראל על אשר שממה--כן אעשה לך  שממה תהיה הר שעיר וכל אדום כלה וידעו כי אני יהוה  {פ}