Gênesis 16

¹א ושרי אשת אברם לא ילדה לו ולה שפחה מצרית ושמה הגר

²ב ותאמר שרי אל אברם הנה נא עצרני יהוה מלדת--בא נא אל שפחתי אולי אבנה ממנה וישמע אברם לקול שרי

³ג ותקח שרי אשת אברם את הגר המצרית שפחתה מקץ עשר שנים לשבת אברם בארץ כנען ותתן אתה לאברם אישה לו לאשה

⁴ד ויבא אל הגר ותהר ותרא כי הרתה ותקל גברתה בעיניה

⁵ה ותאמר שרי אל אברם חמסי עליך--אנכי נתתי שפחתי בחיקך ותרא כי הרתה ואקל בעיניה ישפט יהוה ביני וביניך

⁶ו ויאמר אברם אל שרי הנה שפחתך בידך--עשי לה הטוב בעיניך ותענה שרי ותברח מפניה

⁷ז וימצאה מלאך יהוה על עין המים--במדבר  על העין בדרך שור

⁸ח ויאמר הגר שפחת שרי אי מזה באת--ואנה תלכי ותאמר--מפני שרי גברתי אנכי ברחת

⁹ט ויאמר לה מלאך יהוה שובי אל גברתך והתעני תחת ידיה

¹⁰י ויאמר לה מלאך יהוה הרבה ארבה את זרעך ולא יספר מרב

¹¹יא ויאמר לה מלאך יהוה הנך הרה וילדת בן וקראת שמו ישמעאל כי שמע יהוה אל עניך

¹²יב והוא יהיה פרא אדם--ידו בכל ויד כל בו ועל פני כל אחיו ישכן

¹³יג ותקרא שם יהוה הדבר אליה אתה אל ראי  כי אמרה הגם הלם ראיתי--אחרי ראי

¹⁴יד על כן קרא לבאר באר לחי ראי--הנה בין קדש ובין ברד

¹⁵טו ותלד הגר לאברם בן ויקרא אברם שם בנו אשר ילדה הגר ישמעאל

¹⁶טז ואברם בן שמנים שנה ושש שנים בלדת הגר את ישמעאל לאברם  {ס}