Gênesis 4

¹א והאדם ידע את חוה אשתו ותהר ותלד את קין ותאמר קניתי איש את יהוה

²ב ותסף ללדת את אחיו את הבל ויהי הבל רעה צאן וקין היה עבד אדמה

³ג ויהי מקץ ימים ויבא קין מפרי האדמה מנחה--ליהוה

⁴ד והבל הביא גם הוא מבכרות צאנו ומחלבהן וישע יהוה אל הבל ואל מנחתו

⁵ה ואל קין ואל מנחתו לא שעה ויחר לקין מאד ויפלו פניו

⁶ו ויאמר יהוה אל קין  למה חרה לך ולמה נפלו פניך

⁷ז הלוא אם תיטיב שאת ואם לא תיטיב לפתח חטאת רבץ ואליך תשוקתו ואתה תמשל בו

⁸ח ויאמר קין אל הבל אחיו ויהי בהיותם בשדה ויקם קין אל הבל אחיו ויהרגהו

⁹ט ויאמר יהוה אל קין אי הבל אחיך ויאמר לא ידעתי השמר אחי אנכי

¹⁰י ויאמר מה עשית קול דמי אחיך צעקים אלי מן האדמה

¹¹יא ועתה ארור אתה מן האדמה אשר פצתה את פיה לקחת את דמי אחיך מידך

¹²יב כי תעבד את האדמה לא תסף תת כחה לך נע ונד תהיה בארץ

¹³יג ויאמר קין אל יהוה  גדול עוני מנשא

¹⁴יד הן גרשת אתי היום מעל פני האדמה ומפניך אסתר והייתי נע ונד בארץ והיה כל מצאי יהרגני

¹⁵טו ויאמר לו יהוה לכן כל הרג קין שבעתים יקם וישם יהוה לקין אות לבלתי הכות אתו כל מצאו

¹⁶טז ויצא קין מלפני יהוה וישב בארץ נוד קדמת עדן

¹⁷יז וידע קין את אשתו ותהר ותלד את חנוך ויהי בנה עיר ויקרא שם העיר כשם בנו חנוך

¹⁸יח ויולד לחנוך את עירד ועירד ילד את מחויאל ומחייאל ילד את מתושאל ומתושאל ילד את למך

¹⁹יט ויקח לו למך שתי נשים  שם האחת עדה ושם השנית צלה

²⁰כ ותלד עדה את יבל  הוא היה--אבי ישב אהל ומקנה

²¹כא ושם אחיו יובל  הוא היה--אבי כל תפש כנור ועוגב

²²כב וצלה גם הוא ילדה את תובל קין--לטש כל חרש נחשת וברזל ואחות תובל קין נעמה

²³כג ויאמר למך לנשיו עדה וצלה שמען קולי--נשי למך האזנה אמרתי  כי איש הרגתי לפצעי וילד לחברתי

²⁴כד כי שבעתים יקם קין ולמך שבעים ושבעה

²⁵כה וידע אדם עוד את אשתו ותלד בן ותקרא את שמו שת  כי שת לי אלהים זרע אחר--תחת הבל כי הרגו קין

²⁶כו ולשת גם הוא ילד בן ויקרא את שמו אנוש אז הוחל לקרא בשם יהוה  {ס}