Gênesis 7

¹א ויאמר יהוה לנח בא אתה וכל ביתך אל התבה  כי אתך ראיתי צדיק לפני בדור הזה

²ב מכל הבהמה הטהורה תקח לך שבעה שבעה--איש ואשתו ומן הבהמה אשר לא טהרה הוא שנים--איש ואשתו

³ג גם מעוף השמים שבעה שבעה זכר ונקבה לחיות זרע על פני כל הארץ

⁴ד כי לימים עוד שבעה אנכי ממטיר על הארץ ארבעים יום וארבעים לילה ומחיתי את כל היקום אשר עשיתי מעל פני האדמה

⁵ה ויעש נח ככל אשר צוהו יהוה

⁶ו ונח בן שש מאות שנה והמבול היה מים על הארץ

⁷ז ויבא נח ובניו ואשתו ונשי בניו אתו--אל התבה  מפני מי המבול

⁸ח מן הבהמה הטהורה ומן הבהמה אשר איננה טהרה ומן העוף--וכל אשר רמש על האדמה

⁹ט שנים שנים באו אל נח אל התבה--זכר ונקבה  כאשר צוה אלהים את נח

¹⁰י ויהי לשבעת הימים ומי המבול היו על הארץ

¹¹יא בשנת שש מאות שנה לחיי נח בחדש השני בשבעה עשר יום לחדש--ביום הזה נבקעו כל מעינת תהום רבה וארבת השמים נפתחו

¹²יב ויהי הגשם על הארץ ארבעים יום וארבעים לילה

¹³יג בעצם היום הזה בא נח ושם וחם ויפת בני נח ואשת נח ושלשת נשי בניו אתם--אל התבה

¹⁴יד המה וכל החיה למינה וכל הבהמה למינה וכל הרמש הרמש על הארץ למינהו וכל העוף למינהו כל צפור כל כנף

¹⁵טו ויבאו אל נח אל התבה שנים שנים מכל הבשר אשר בו רוח חיים

¹⁶טז והבאים זכר ונקבה מכל בשר באו כאשר צוה אתו אלהים ויסגר יהוה בעדו

¹⁷יז ויהי המבול ארבעים יום על הארץ וירבו המים וישאו את התבה ותרם מעל הארץ

¹⁸יח ויגברו המים וירבו מאד על הארץ ותלך התבה על פני המים

¹⁹יט והמים גברו מאד מאד--על הארץ ויכסו כל ההרים הגבהים אשר תחת כל השמים

²⁰כ חמש עשרה אמה מלמעלה גברו המים ויכסו ההרים

²¹כא ויגוע כל בשר הרמש על הארץ בעוף ובבהמה ובחיה ובכל השרץ השרץ על הארץ--וכל האדם

²²כב כל אשר נשמת רוח חיים באפיו מכל אשר בחרבה--מתו

²³כג וימח את כל היקום אשר על פני האדמה מאדם עד בהמה עד רמש ועד עוף השמים וימחו מן הארץ וישאר אך נח ואשר אתו בתבה

²⁴כד ויגברו המים על הארץ חמשים ומאת יום