Isaías 21

¹א משא מדבר ים  כסופות בנגב לחלף ממדבר בא מארץ נוראה

²ב חזות קשה הגד לי  הבוגד בוגד והשודד שודד עלי עילם צורי מדי כל אנחתה השבתי

³ג על כן מלאו מתני חלחלה--צירים אחזוני כצירי יולדה נעויתי משמע נבהלתי מראות

⁴ד תעה לבבי פלצות בעתתני את נשף חשקי שם לי לחרדה

⁵ה ערך השלחן צפה הצפית אכול שתה קומו השרים משחו מגן  {ס}

⁶ו כי כה אמר אלי אדני  לך העמד המצפה אשר יראה יגיד

⁷ז וראה רכב צמד פרשים--רכב חמור רכב גמל והקשיב קשב רב קשב

⁸ח ויקרא אריה--על מצפה אדני אנכי עמד תמיד יומם ועל משמרתי אנכי נצב כל הלילות

⁹ט והנה זה בא רכב איש צמד פרשים ויען ויאמר נפלה נפלה בבל וכל פסילי אלהיה שבר לארץ

¹⁰י מדשתי ובן גרני  אשר שמעתי מאת יהוה צבאות אלהי ישראל--הגדתי לכם  {פ}

¹¹יא משא דומה  אלי קרא משעיר שמר מה מלילה שמר מה מליל

¹²יב אמר שמר אתה בקר וגם לילה אם תבעיון בעיו שבו אתיו  {פ}

¹³יג משא בערב  ביער בערב תלינו ארחות דדנים

¹⁴יד לקראת צמא התיו מים ישבי ארץ תימא בלחמו קדמו נדד

¹⁵טו כי מפני חרבות נדדו מפני חרב נטושה ומפני קשת דרוכה ומפני כבד מלחמה  {ס}

¹⁶טז כי כה אמר אדני אלי  בעוד שנה כשני שכיר וכלה כל כבוד קדר

¹⁷יז ושאר מספר קשת גבורי בני קדר ימעטו  כי יהוה אלהי ישראל דבר  {ס}