Isaías 38

¹א בימים ההם חלה חזקיהו למות ויבוא אליו ישעיהו בן אמוץ הנביא ויאמר אליו כה אמר יהוה צו לביתך--כי מת אתה ולא תחיה

²ב ויסב חזקיהו פניו אל הקיר ויתפלל אל יהוה

³ג ויאמר אנה יהוה זכר נא את אשר התהלכתי לפניך באמת ובלב שלם והטוב בעיניך עשיתי ויבך חזקיהו בכי גדול  {ס}

⁴ד ויהי דבר יהוה אל ישעיהו לאמר

⁵ה הלוך ואמרת אל חזקיהו כה אמר יהוה אלהי דוד אביך שמעתי את תפלתך ראיתי את דמעתך הנני יוסף על ימיך חמש עשרה שנה

⁶ו ומכף מלך אשור אצילך ואת העיר הזאת וגנותי על העיר הזאת

⁷ז וזה לך האות מאת יהוה אשר יעשה יהוה את הדבר הזה אשר דבר

⁸ח הנני משיב את צל המעלות אשר ירדה במעלות אחז בשמש אחרנית--עשר מעלות ותשב השמש עשר מעלות במעלות אשר ירדה  {ס}

⁹ט מכתב לחזקיהו מלך יהודה בחלתו ויחי מחליו

¹⁰י אני אמרתי בדמי ימי אלכה--בשערי שאול פקדתי יתר שנותי

¹¹יא אמרתי לא אראה יה יה בארץ החיים לא אביט אדם עוד עם יושבי חדל

¹²יב דורי נסע ונגלה מני--כאהל רעי קפדתי כארג חיי מדלה יבצעני מיום עד לילה תשלימני

¹³יג שויתי עד בקר כארי כן ישבר כל עצמותי מיום עד לילה תשלימני

¹⁴יד כסוס עגור כן אצפצף אהגה כיונה דלו עיני למרום אדני עשקה לי ערבני

¹⁵טו מה אדבר ואמר לי והוא עשה אדדה כל שנותי על מר נפשי

¹⁶טז אדני עליהם יחיו ולכל בהן חיי רוחי ותחלימני והחיני

¹⁷יז הנה לשלום מר לי מר ואתה חשקת נפשי משחת בלי כי השלכת אחרי גוך כל חטאי

¹⁸יח כי לא שאול תודך מות יהללך לא ישברו יורדי בור אל אמתך

¹⁹יט חי חי הוא יודך כמוני היום אב לבנים יודיע אל אמתך

²⁰כ יהוה להושיעני ונגנותי ננגן כל ימי חיינו על בית יהוה

²¹כא ויאמר ישעיהו ישאו דבלת תאנים וימרחו על השחין ויחי

²²כב ויאמר חזקיהו מה אות  כי אעלה בית יהוה  {ס}