Isaías 48

¹א שמעו זאת בית יעקב הנקראים בשם ישראל וממי יהודה יצאו הנשבעים בשם יהוה ובאלהי ישראל יזכירו--לא באמת ולא בצדקה

²ב כי מעיר הקדש נקראו ועל אלהי ישראל נסמכו  יהוה צבאות שמו  {ס}

³ג הראשנות מאז הגדתי ומפי יצאו ואשמיעם פתאם עשיתי ותבאנה

⁴ד מדעתי כי קשה אתה וגיד ברזל ערפך ומצחך נחושה

⁵ה ואגיד לך מאז בטרם תבוא השמעתיך--פן תאמר עצבי עשם ופסלי ונסכי צום

⁶ו שמעת חזה כלה ואתם הלוא תגידו  השמעתיך חדשות מעתה ונצרות ולא ידעתם

⁷ז עתה נבראו ולא מאז ולפני יום ולא שמעתם--פן תאמר הנה ידעתין

⁸ח גם לא שמעת גם לא ידעת--גם מאז לא פתחה אזנך  כי ידעתי בגוד תבגוד ופשע מבטן קרא לך

⁹ט למען שמי אאריך אפי ותהלתי אחטם לך--לבלתי הכריתך

¹⁰י הנה צרפתיך ולא בכסף בחרתיך בכור עני

¹¹יא למעני למעני אעשה כי איך יחל וכבודי לאחר לא אתן  {פ}

¹²יב שמע אלי יעקב וישראל מקראי  אני הוא אני ראשון אף אני אחרון

¹³יג אף ידי יסדה ארץ וימיני טפחה שמים קרא אני אליהם יעמדו יחדו

¹⁴יד הקבצו כלכם ושמעו מי בהם הגיד את אלה יהוה אהבו--יעשה חפצו בבבל וזרעו כשדים

¹⁵טו אני אני דברתי אף קראתיו הבאתיו והצליח דרכו

¹⁶טז קרבו אלי שמעו זאת לא מראש בסתר דברתי--מעת היותה שם אני ועתה אדני יהוה שלחני--ורוחו  {פ}

¹⁷יז כה אמר יהוה גאלך קדוש ישראל  אני יהוה אלהיך מלמדך להועיל מדריכך בדרך תלך

¹⁸יח לוא הקשבת למצותי ויהי כנהר שלומך וצדקתך כגלי הים

¹⁹יט ויהי כחול זרעך וצאצאי מעיך כמעתיו לא יכרת ולא ישמד שמו מלפני  {ס}

²⁰כ צאו מבבל ברחו מכשדים בקול רנה הגידו השמיעו זאת הוציאוה עד קצה הארץ אמרו גאל יהוה עבדו יעקב

²¹כא ולא צמאו בחרבות הוליכם--מים מצור הזיל למו ויבקע צור--ויזבו מים

²²כב אין שלום אמר יהוה לרשעים  {פ}