Isaías 9

¹א העם ההלכים בחשך ראו אור גדול  ישבי בארץ צלמות אור נגה עליהם

²ב הרבית הגוי לא (לו) הגדלת השמחה שמחו לפניך כשמחת בקציר כאשר יגילו בחלקם שלל

³ג כי את על סבלו ואת מטה שכמו שבט הנגש בו--החתת כיום מדין

⁴ד כי כל סאון סאן ברעש ושמלה מגוללה בדמים והיתה לשרפה מאכלת אש

⁵ה כי ילד ילד לנו בן נתן לנו ותהי המשרה על שכמו ויקרא שמו פלא יועץ אל גבור אבי עד שר שלום

⁶ו לם רבה (למרבה) המשרה ולשלום אין קץ על כסא דוד ועל ממלכתו להכין אתה ולסעדה במשפט ובצדקה מעתה ועד עולם קנאת יהוה צבאות תעשה זאת  {פ}

⁷ז דבר שלח אדני ביעקב ונפל בישראל

⁸ח וידעו העם כלו אפרים ויושב שמרון בגאוה ובגדל לבב לאמר

⁹ט לבנים נפלו וגזית נבנה שקמים גדעו וארזים נחליף

¹⁰י וישגב יהוה את צרי רצין עליו ואת איביו יסכסך

¹¹יא ארם מקדם ופלשתים מאחור ויאכלו את ישראל בכל פה בכל זאת לא שב אפו ועוד ידו נטויה

¹²יב והעם לא שב עד המכהו ואת יהוה צבאות לא דרשו  {ס}

¹³יג ויכרת יהוה מישראל ראש וזנב כפה ואגמון--יום אחד

¹⁴יד זקן ונשוא פנים הוא הראש ונביא מורה שקר הוא הזנב

¹⁵טו ויהיו מאשרי העם הזה מתעים ומאשריו מבלעים

¹⁶טז על כן על בחוריו לא ישמח אדני ואת יתמיו ואת אלמנותיו לא ירחם--כי כלו חנף ומרע וכל פה דבר נבלה בכל זאת לא שב אפו ועוד ידו נטויה

¹⁷יז כי בערה כאש רשעה שמיר ושית תאכל ותצת בסבכי היער ויתאבכו גאות עשן

¹⁸יח בעברת יהוה צבאות נעתם ארץ ויהי העם כמאכלת אש איש אל אחיו לא יחמלו

¹⁹יט ויגזר על ימין ורעב ויאכל על שמאול ולא שבעו  איש בשר זרעו יאכלו

²⁰כ מנשה את אפרים ואפרים את מנשה--יחדו המה על יהודה בכל זאת לא שב אפו ועוד ידו נטויה  {ס}