Levítico 21

¹א ויאמר יהוה אל משה אמר אל הכהנים בני אהרן ואמרת אלהם לנפש לא יטמא בעמיו

²ב כי אם לשארו הקרב אליו  לאמו ולאביו ולבנו ולבתו ולאחיו

³ג ולאחתו הבתולה הקרובה אליו אשר לא היתה לאיש--לה יטמא

⁴ד לא יטמא בעל בעמיו--להחלו

⁵ה לא יקרחה (יקרחו) קרחה בראשם ופאת זקנם לא יגלחו ובבשרם--לא ישרטו שרטת

⁶ו קדשים יהיו לאלהיהם ולא יחללו שם אלהיהם  כי את אשי יהוה לחם אלהיהם הם מקריבם--והיו קדש

⁷ז אשה זנה וחללה לא יקחו ואשה גרושה מאישה לא יקחו  כי קדש הוא לאלהיו

⁸ח וקדשתו--כי את לחם אלהיך הוא מקריב קדש יהיה לך--כי קדוש אני יהוה מקדשכם

⁹ט ובת איש כהן כי תחל לזנות--את אביה היא מחללת באש תשרף  {ס}

¹⁰י והכהן הגדול מאחיו אשר יוצק על ראשו שמן המשחה ומלא את ידו ללבש את הבגדים--את ראשו לא יפרע ובגדיו לא יפרם

¹¹יא ועל כל נפשת מת לא יבא  לאביו ולאמו לא יטמא

¹²יב ומן המקדש לא יצא ולא יחלל את מקדש אלהיו  כי נזר שמן משחת אלהיו עליו--אני יהוה

¹³יג והוא אשה בבתוליה יקח

¹⁴יד אלמנה וגרושה וחללה זנה את אלה לא יקח  כי אם בתולה מעמיו יקח אשה

¹⁵טו ולא יחלל זרעו בעמיו  כי אני יהוה מקדשו  {ס}

¹⁶טז וידבר יהוה אל משה לאמר

¹⁷יז דבר אל אהרן לאמר  איש מזרעך לדרתם אשר יהיה בו מום--לא יקרב להקריב לחם אלהיו

¹⁸יח כי כל איש אשר בו מום לא יקרב  איש עור או פסח או חרם או שרוע

¹⁹יט או איש אשר יהיה בו שבר רגל או שבר יד

²⁰כ או גבן או דק או תבלל בעינו או גרב או ילפת או מרוח אשך

²¹כא כל איש אשר בו מום מזרע אהרן הכהן--לא יגש להקריב את אשי יהוה  מום בו--את לחם אלהיו לא יגש להקריב

²²כב לחם אלהיו מקדשי הקדשים ומן הקדשים יאכל

²³כג אך אל הפרכת לא יבא ואל המזבח לא יגש--כי מום בו ולא יחלל את מקדשי כי אני יהוה מקדשם

²⁴כד וידבר משה אל אהרן ואל בניו ואל כל בני ישראל  {פ}