Levítico 22

¹א וידבר יהוה אל משה לאמר

²ב דבר אל אהרן ואל בניו וינזרו מקדשי בני ישראל ולא יחללו את שם קדשי--אשר הם מקדשים לי אני יהוה

³ג אמר אלהם לדרתיכם כל איש אשר יקרב מכל זרעכם אל הקדשים אשר יקדישו בני ישראל ליהוה וטמאתו עליו  ונכרתה הנפש ההוא מלפני--אני יהוה

⁴ד איש איש מזרע אהרן והוא צרוע או זב--בקדשים לא יאכל עד אשר יטהר והנגע בכל טמא נפש או איש אשר תצא ממנו שכבת זרע

⁵ה או איש אשר יגע בכל שרץ אשר יטמא לו או באדם אשר יטמא לו לכל טמאתו

⁶ו נפש אשר תגע בו וטמאה עד הערב ולא יאכל מן הקדשים כי אם רחץ בשרו במים

⁷ז ובא השמש וטהר ואחר יאכל מן הקדשים כי לחמו הוא

⁸ח נבלה וטרפה לא יאכל לטמאה בה  אני יהוה

⁹ט ושמרו את משמרתי ולא ישאו עליו חטא ומתו בו כי יחללהו  אני יהוה מקדשם

¹⁰י וכל זר לא יאכל קדש תושב כהן ושכיר לא יאכל קדש

¹¹יא וכהן כי יקנה נפש קנין כספו--הוא יאכל בו ויליד ביתו הם יאכלו בלחמו

¹²יב ובת כהן--כי תהיה לאיש זר  הוא בתרומת הקדשים לא תאכל

¹³יג ובת כהן כי תהיה אלמנה וגרושה וזרע אין לה--ושבה אל בית אביה כנעוריה מלחם אביה תאכל וכל זר לא יאכל בו

¹⁴יד ואיש כי יאכל קדש בשגגה--ויסף חמשיתו עליו ונתן לכהן את הקדש

¹⁵טו ולא יחללו את קדשי בני ישראל--את אשר ירימו ליהוה

¹⁶טז והשיאו אותם עון אשמה באכלם את קדשיהם  כי אני יהוה מקדשם  {פ}

¹⁷יז וידבר יהוה אל משה לאמר

¹⁸יח דבר אל אהרן ואל בניו ואל כל בני ישראל ואמרת אלהם  איש איש מבית ישראל ומן הגר בישראל אשר יקריב קרבנו לכל נדריהם ולכל נדבותם אשר יקריבו ליהוה לעלה

¹⁹יט לרצנכם  תמים זכר--בבקר בכשבים ובעזים

²⁰כ כל אשר בו מום לא תקריבו  כי לא לרצון יהיה לכם

²¹כא ואיש כי יקריב זבח שלמים ליהוה לפלא נדר או לנדבה בבקר או בצאן--תמים יהיה לרצון כל מום לא יהיה בו

²²כב עורת או שבור או חרוץ או יבלת או גרב או ילפת--לא תקריבו אלה ליהוה ואשה לא תתנו מהם על המזבח--ליהוה

²³כג ושור ושה שרוע וקלוט--נדבה תעשה אתו ולנדר לא ירצה

²⁴כד ומעוך וכתות ונתוק וכרות לא תקריבו ליהוה ובארצכם לא תעשו

²⁵כה ומיד בן נכר לא תקריבו את לחם אלהיכם--מכל אלה  כי משחתם בהם מום בם לא ירצו לכם  {ס}

²⁶כו וידבר יהוה אל משה לאמר

²⁷כז שור או כשב או עז כי יולד והיה שבעת ימים תחת אמו ומיום השמיני והלאה ירצה לקרבן אשה ליהוה

²⁸כח ושור או שה--אתו ואת בנו לא תשחטו ביום אחד

²⁹כט וכי תזבחו זבח תודה ליהוה--לרצנכם תזבחו

³⁰ל ביום ההוא יאכל לא תותירו ממנו עד בקר  אני יהוה

³¹לא ושמרתם מצותי ועשיתם אתם  אני יהוה

³²לב ולא תחללו את שם קדשי ונקדשתי בתוך בני ישראל  אני יהוה מקדשכם

³³לג המוציא אתכם מארץ מצרים להיות לכם לאלהים  אני יהוה  {פ}