Levítico 24

¹א וידבר יהוה אל משה לאמר

²ב צו את בני ישראל ויקחו אליך שמן זית זך כתית--למאור  להעלת נר תמיד

³ג מחוץ לפרכת העדת באהל מועד יערך אתו אהרן מערב עד בקר לפני יהוה--תמיד  חקת עולם לדרתיכם

⁴ד על המנרה הטהרה יערך את הנרות לפני יהוה תמיד  {פ}

⁵ה ולקחת סלת--ואפית אתה שתים עשרה חלות שני עשרנים יהיה החלה האחת

⁶ו ושמת אותם שתים מערכות שש המערכת על השלחן הטהר לפני יהוה

⁷ז ונתת על המערכת לבנה זכה והיתה ללחם לאזכרה אשה ליהוה

⁸ח ביום השבת ביום השבת יערכנו לפני יהוה--תמיד  מאת בני ישראל ברית עולם

⁹ט והיתה לאהרן ולבניו ואכלהו במקום קדש  כי קדש קדשים הוא לו מאשי יהוה--חק עולם  {ס}

¹⁰י ויצא בן אשה ישראלית והוא בן איש מצרי בתוך בני ישראל וינצו במחנה בן הישראלית ואיש הישראלי

¹¹יא ויקב בן האשה הישראלית את השם ויקלל ויביאו אתו אל משה ושם אמו שלמית בת דברי למטה דן

¹²יב ויניחהו במשמר לפרש להם על פי יהוה  {פ}

¹³יג וידבר יהוה אל משה לאמר

¹⁴יד הוצא את המקלל אל מחוץ למחנה וסמכו כל השמעים את ידיהם על ראשו ורגמו אתו כל העדה

¹⁵טו ואל בני ישראל תדבר לאמר  איש איש כי יקלל אלהיו ונשא חטאו

¹⁶טז ונקב שם יהוה מות יומת רגום ירגמו בו כל העדה  כגר כאזרח--בנקבו שם יומת

¹⁷יז ואיש כי יכה כל נפש אדם--מות יומת

¹⁸יח ומכה נפש בהמה ישלמנה--נפש תחת נפש

¹⁹יט ואיש כי יתן מום בעמיתו--כאשר עשה כן יעשה לו

²⁰כ שבר תחת שבר עין תחת עין שן תחת שן--כאשר יתן מום באדם כן ינתן בו

²¹כא ומכה בהמה ישלמנה ומכה אדם יומת

²²כב משפט אחד יהיה לכם כגר כאזרח יהיה  כי אני יהוה אלהיכם

²³כג וידבר משה אל בני ישראל ויוציאו את המקלל אל מחוץ למחנה וירגמו אתו אבן ובני ישראל עשו כאשר צוה יהוה את משה  {פ}