Miqueias 7

¹א אללי לי כי הייתי כאספי קיץ כעללת בציר  אין אשכול לאכול בכורה אותה נפשי

²ב אבד חסיד מן הארץ וישר באדם אין  כלם לדמים יארבו איש את אחיהו יצודו חרם

³ג על הרע כפים להיטיב השר שאל והשפט בשלום והגדול דבר הות נפשו הוא--ויעבתוה

⁴ד טובם כחדק ישר ממסוכה יום מצפיך פקדתך באה עתה תהיה מבוכתם

⁵ה אל תאמינו ברע אל תבטחו באלוף משכבת חיקך שמר פתחי פיך

⁶ו כי בן מנבל אב בת קמה באמה כלה בחמתה  איבי איש אנשי ביתו

⁷ז ואני ביהוה אצפה אוחילה לאלהי ישעי  ישמעני אלהי

⁸ח אל תשמחי איבתי לי כי נפלתי קמתי  כי אשב בחשך יהוה אור לי  {פ}

⁹ט זעף יהוה אשא כי חטאתי לו  עד אשר יריב ריבי ועשה משפטי--יוציאני לאור אראה בצדקתו

¹⁰י ותרא איבתי ותכסה בושה--האמרה אלי איו יהוה אלהיך עיני תראינה בה עתה תהיה למרמס כטיט חוצות

¹¹יא יום לבנות גדריך יום ההוא ירחק חק

¹²יב יום הוא ועדיך יבוא למני אשור וערי מצור ולמני מצור ועד נהר וים מים והר ההר

¹³יג והיתה הארץ לשממה על ישביה מפרי מעלליהם  {פ}

¹⁴יד רעה עמך בשבטך צאן נחלתך--שכני לבדד יער בתוך כרמל ירעו בשן וגלעד כימי עולם

¹⁵טו כימי צאתך מארץ מצרים אראנו נפלאות

¹⁶טז יראו גוים ויבשו מכל גבורתם ישימו יד על פה אזניהם תחרשנה

¹⁷יז ילחכו עפר כנחש--כזחלי ארץ ירגזו ממסגרתיהם אל יהוה אלהינו יפחדו ויראו ממך

¹⁸יח מי אל כמוך נשא עון ועבר על פשע לשארית נחלתו  לא החזיק לעד אפו כי חפץ חסד הוא

¹⁹יט ישוב ירחמנו יכבש עונתינו ותשליך במצלות ים כל חטאותם

²⁰כ תתן אמת ליעקב חסד לאברהם אשר נשבעת לאבתינו מימי קדם  {ש}