Números 7

¹א ויהי ביום כלות משה להקים את המשכן וימשח אתו ויקדש אתו ואת כל כליו ואת המזבח ואת כל כליו וימשחם ויקדש אתם

²ב ויקריבו נשיאי ישראל ראשי בית אבתם  הם נשיאי המטת הם העמדים על הפקדים

³ג ויביאו את קרבנם לפני יהוה שש עגלת צב ושני עשר בקר--עגלה על שני הנשאים ושור לאחד ויקריבו אותם לפני המשכן

⁴ד ויאמר יהוה אל משה לאמר

⁵ה קח מאתם והיו לעבד את עבדת אהל מועד ונתתה אותם אל הלוים איש כפי עבדתו

⁶ו ויקח משה את העגלת ואת הבקר ויתן אותם אל הלוים

⁷ז את שתי העגלות ואת ארבעת הבקר--נתן לבני גרשון  כפי עבדתם

⁸ח ואת ארבע העגלת ואת שמנת הבקר--נתן לבני מררי  כפי עבדתם ביד איתמר בן אהרן הכהן

⁹ט ולבני קהת לא נתן  כי עבדת הקדש עלהם בכתף ישאו

¹⁰י ויקריבו הנשאים את חנכת המזבח ביום המשח אתו ויקריבו הנשיאם את קרבנם לפני המזבח

¹¹יא ויאמר יהוה אל משה  נשיא אחד ליום נשיא אחד ליום יקריבו את קרבנם לחנכת המזבח  {ס}

¹²יב ויהי המקריב ביום הראשון--את קרבנו  נחשון בן עמינדב למטה יהודה

¹³יג וקרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

¹⁴יד כף אחת עשרה זהב מלאה קטרת

¹⁵טו פר אחד בן בקר איל אחד כבש אחד בן שנתו--לעלה

¹⁶טז שעיר עזים אחד לחטאת

¹⁷יז ולזבח השלמים בקר שנים אילם חמשה עתודים חמשה כבשים בני שנה חמשה  זה קרבן נחשון בן עמינדב  {פ}

¹⁸יח ביום השני הקריב נתנאל בן צוער--נשיא יששכר

¹⁹יט הקרב את קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

²⁰כ כף אחת עשרה זהב מלאה קטרת

²¹כא פר אחד בן בקר איל אחד כבש אחד בן שנתו--לעלה

²²כב שעיר עזים אחד לחטאת

²³כג ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן נתנאל בן צוער  {פ}

²⁴כד ביום השלישי נשיא לבני זבולן--אליאב בן חלן

²⁵כה קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

²⁶כו כף אחת עשרה זהב מלאה קטרת

²⁷כז פר אחד בן בקר איל אחד כבש אחד בן שנתו--לעלה

²⁸כח שעיר עזים אחד לחטאת

²⁹כט ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן אליאב בן חלן  {פ}

³⁰ל ביום הרביעי נשיא לבני ראובן--אליצור בן שדיאור

³¹לא קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

³²לב כף אחת עשרה זהב מלאה קטרת

³³לג פר אחד בן בקר איל אחד כבש אחד בן שנתו--לעלה

³⁴לד שעיר עזים אחד לחטאת

³⁵לה ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן אליצור בן שדיאור  {פ}

³⁶לו ביום החמישי נשיא לבני שמעון--שלמיאל בן צורישדי

³⁷לז קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

³⁸לח כף אחת עשרה זהב מלאה קטרת

³⁹לט פר אחד בן בקר איל אחד כבש אחד בן שנתו--לעלה

⁴⁰מ שעיר עזים אחד לחטאת

⁴¹מא ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן שלמיאל בן צורישדי  {פ}

⁴²מב ביום הששי נשיא לבני גד--אליסף בן דעואל

⁴³מג קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

⁴⁴מד כף אחת עשרה זהב מלאה קטרת

⁴⁵מה פר אחד בן בקר איל אחד כבש אחד בן שנתו--לעלה

⁴⁶מו שעיר עזים אחד לחטאת

⁴⁷מז ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן אליסף בן דעואל  {פ}

⁴⁸מח ביום השביעי נשיא לבני אפרים--אלישמע בן עמיהוד

⁴⁹מט קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

⁵⁰נ כף אחת עשרה זהב מלאה קטרת

⁵¹נא פר אחד בן בקר איל אחד כבש אחד בן שנתו--לעלה

⁵²נב שעיר עזים אחד לחטאת

⁵³נג ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן אלישמע בן עמיהוד  {פ}

⁵⁴נד ביום השמיני נשיא לבני מנשה--גמליאל בן פדהצור

⁵⁵נה קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

⁵⁶נו כף אחת עשרה זהב מלאה קטרת

⁵⁷נז פר אחד בן בקר איל אחד כבש אחד בן שנתו--לעלה

⁵⁸נח שעיר עזים אחד לחטאת

⁵⁹נט ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן גמליאל בן פדהצור  {פ}

⁶⁰ס ביום התשיעי נשיא לבני בנימן--אבידן בן גדעני

⁶¹סא קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

⁶²סב כף אחת עשרה זהב מלאה קטרת

⁶³סג פר אחד בן בקר איל אחד כבש אחד בן שנתו--לעלה

⁶⁴סד שעיר עזים אחד לחטאת

⁶⁵סה ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן אבידן בן גדעני  {פ}

⁶⁶סו ביום העשירי נשיא לבני דן--אחיעזר בן עמישדי

⁶⁷סז קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

⁶⁸סח כף אחת עשרה זהב מלאה קטרת

⁶⁹סט פר אחד בן בקר איל אחד כבש אחד בן שנתו--לעלה

⁷⁰ע שעיר עזים אחד לחטאת

⁷¹עא ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן אחיעזר בן עמישדי  {פ}

⁷²עב ביום עשתי עשר יום נשיא לבני אשר--פגעיאל בן עכרן

⁷³עג קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

⁷⁴עד כף אחת עשרה זהב מלאה קטרת

⁷⁵עה פר אחד בן בקר איל אחד כבש אחד בן שנתו--לעלה

⁷⁶עו שעיר עזים אחד לחטאת

⁷⁷עז ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן פגעיאל בן עכרן  {פ}

⁷⁸עח ביום שנים עשר יום נשיא לבני נפתלי--אחירע בן עינן

⁷⁹עט קרבנו קערת כסף אחת שלשים ומאה משקלה מזרק אחד כסף שבעים שקל בשקל הקדש שניהם מלאים סלת בלולה בשמן--למנחה

⁸⁰פ כף אחת עשרה זהב מלאה קטרת

⁸¹פא פר אחד בן בקר איל אחד כבש אחד בן שנתו--לעלה

⁸²פב שעיר עזים אחד לחטאת

⁸³פג ולזבח השלמים בקר שנים אילם חמשה עתדים חמשה כבשים בני שנה חמשה  זה קרבן אחירע בן עינן  {פ}

⁸⁴פד זאת חנכת המזבח ביום המשח אתו מאת נשיאי ישראל  קערת כסף שתים עשרה מזרקי כסף שנים עשר כפות זהב שתים עשרה

⁸⁵פה שלשים ומאה הקערה האחת כסף ושבעים המזרק האחד כל כסף הכלים אלפים וארבע מאות בשקל הקדש

⁸⁶פו כפות זהב שתים עשרה מלאת קטרת עשרה עשרה הכף בשקל הקדש כל זהב הכפות עשרים ומאה

⁸⁷פז כל הבקר לעלה שנים עשר פרים אילם שנים עשר כבשים בני שנה שנים עשר--ומנחתם ושעירי עזים שנים עשר לחטאת

⁸⁸פח וכל בקר זבח השלמים עשרים וארבעה פרים אילם ששים עתדים ששים כבשים בני שנה ששים  זאת חנכת המזבח אחרי המשח אתו

⁸⁹פט ובבא משה אל אהל מועד לדבר אתו וישמע את הקול מדבר אליו מעל הכפרת אשר על ארן העדת מבין שני הכרבים וידבר אליו  {פ}