Salmos 26
1א לדוד שפטני יהוה-- כי-אני בתמי הלכתי וביהוה בטחתי לא אמעד
2ב בחנני יהוה ונסני צרופה (צרפה) כליותי ולבי
3ג כי-חסדך לנגד עיני והתהלכתי באמתך
4ד לא-ישבתי עם-מתי-שוא ועם נעלמים לא אבוא
5ה שנאתי קהל מרעים ועם-רשעים לא אשב
6ו ארחץ בנקיון כפי ואסבבה את-מזבחך יהוה
7ז לשמע בקול תודה ולספר כל-נפלאותיך
8ח יהוה--אהבתי מעון ביתך ומקום משכן כבודך
9ט אל-תאסף עם-חטאים נפשי ועם-אנשי דמים חיי
10י אשר-בידיהם זמה וימינם מלאה שחד
11יא ואני בתמי אלך פדני וחנני
12יב רגלי עמדה במישור במקהלים אברך יהוה