Habacuque 2

¹על משמרתי אעמדה ואתיצבה על מצור ואצפה לראות מה ידבר בי ומה אשיב על תוכחתי:

²ויענני יהוה ויאמר כתוב חזון ובאר על הלחות למען ירוץ קורא בו:

³כי עוד חזון למועד ויפח לקץ ולא יכזב אם יתמהמה חכה לו כי בא יבא לא יאחר:

⁴הנה עפלה לא ישרה נפשו בו וצדיק באמונתו יחיה:

⁵ואף כי היין בוגד גבר יהיר ולא ינוה אשר הרחיב כשאול נפשו והוא כמות ולא ישבע ויאסף אליו כל הגוים ויקבץ אליו כל העמים:

⁶הלוא אלה כלם עליו משל ישאו ומליצה חידות לו ויאמר הוי המרבה לא לו עד מתי ומכביד עליו עבטיט:

⁷הלוא פתע יקומו נשכיך ויקצו מזעזעיך והיית למשסות למו:

⁸כי אתה שלות גוים רבים ישלוך כל יתר עמים מדמי אדם וחמס ארץ קריה וכל ישבי בה:

⁹הוי בצע בצע רע לביתו לשום במרום קנו להנצל מכף רע:

¹⁰יעצת בשת לביתך קצות עמים רבים וחוטא נפשך:

¹¹כי אבן מקיר תזעק וכפיס מעץ יעננה:

¹²הוי בנה עיר בדמים וכונן קריה בעולה:

¹³הלוא הנה מאת יהוה צבאות וייגעו עמים בדי אש ולאמים בדי ריק יעפו:

¹⁴כי תמלא הארץ לדעת את כבוד יהוה כמים יכסו על ים:

¹⁵הוי משקה רעהו מספח חמתך ואף שכר למען הביט על מעוריהם:

¹⁶שבעת קלון מכבוד שתה גם אתה והערל תסוב עליך כוס ימין יהוה וקיקלון על כבודך:

¹⁷כי חמס לבנון יכסך ושד בהמות יחיתן מדמי אדם וחמס ארץ קריה וכל ישבי בה:

¹⁸מה הועיל פסל כי פסלו יצרו מסכה ומורה שקר כי בטח יצר יצרו עליו לעשות אלילים אלמים:

¹⁹הוי אמר לעץ הקיצה עורי לאבן דומם הוא יורה הנה הוא תפוש זהב וכסף וכל רוח אין בקרבו:

²⁰ויהוה בהיכל קדשו הס מפניו כל הארץ: