Marcos 8

¹ויהי בימים ההם בהקבץ עם רב ואין להם מה יאכלו ויקרא אל תלמידיו ויאמר אליהם:

²נכמרו רחמי על העם כי זה שלשת ימים עמדו עמדי ואין להם לחם לאכל:

³והיה בשלחי אותם רעבים לבתיהם יתעלפו בדרך כי יש מהם אשר באו ממרחק:

⁴ויענו אתו תלמידיו מאין יוכל איש להשביע את אלה פה במדבר לחם:

⁵וישאל אותם כמה ככרות לחם יש לכם ויאמרו שבע:

⁶ויצו את העם לשבת לארץ ויקח את שבע ככרות הלחם ויברך ויפרס ויתן אותם לתלמידיו לשום לפניהם וישימו לפני העם:

⁷ויהי להם מעט דגים קטנים ויברך ויאמר לשום לפניהם גם את אלה:

⁸ויאכלו וישבעו וישאו מן הפתותים הנותרים שבעת דודים:

⁹והאכלים היו כארבעת אלפי איש וישלחם:

¹⁰אז ירד באניה עם תלמידיו ויבא אל גלילות דלמונתא:

¹¹ויצאו הפרושים ויחלו להתוכח אתו וישאלו מעמו אות מן השמים והם מנסים אתו:

¹²ויאנח ברוחו ויאמר מה הדור הזה מבקש לו אות אמן אמר אני לכם אם ינתן אות לדור הזה:

¹³ויעזב אותם וירד באניה וישב ויעבר אל עבר הים:

¹⁴וישכחו לקחת אתם לחם ולא היה להם באניה בלתי אם ככר לחם אחת:

¹⁵ויזהר אותם לאמר ראו השמרו לכם משאר הפרושים ומשאר הורדוס:

¹⁶ויחשבו ויאמרו איש אל רעהו על כי לחם אין אתנו:

¹⁷וידע ישוע ויאמר להם מה תחשבו על כי לחם אין לכם העוד לא תשכילו ולא תבינו ולבכם עודנו מטמטם:

¹⁸עינים לכם ולא תראו ואזנים לכם ולא תשמעו ולא תזכרו:

¹⁹כאשר פרסתי את חמשת ככרות הלחם לחמשת אלפי איש כמה סלים מלאי פתותים נשאתם ויאמרו אליו שנים עשר:

²⁰ובשבע לארבעת אלפי איש כמה דודים מלאי פתותים נשאתם ויאמרו אליו שבעה:

²¹ויאמר אליהם איך לא תבינו:

²²ויבא אל בית צידה ויביאו אליו איש עור ויתחננו לו לגעת בו:

²³ויאחז ביד העור ויוליכהו אל מחוץ לכפר וירק בעיניו וישם את ידיו עליו וישאלהו לאמר הראה אתה דבר:

²⁴ויבט ויאמר אראה את בני האדם כי מתהלכים כאילנות אני ראה:

²⁵ויוסף לשום את ידיו על עיניו ותפקחנה עיניו וירפא וירא הכל היטב עד למרחוק:

²⁶וישלחהו אל ביתו לאמר אל תבא בתוך הכפר ואל תדבר לאיש בכפר:

²⁷ויצא ישוע ותלמידיו ללכת אל כפרי קיסרין של פילפוס ויהי בדרך וישאל את תלמידיו ויאמר אליהם מה אמרים עלי האנשים מי אני:

²⁸ויענו ויאמרו יוחנן המטביל ויש אמרים אליהו ואחרים אמרים אחד מן הנביאים:

²⁹וישאל אתם לאמר ואתם מה תאמרו עלי מי אני ויען פטרוס ויאמר אליו אתה הוא המשיח:

³⁰ויצו אתם בגערה לבלתי דבר עליו לאיש:

³¹ויחל ללמדם כי צריך בן האדם לענות הרבה וימאס על ידי הזקנים והכהנים הגדולים והסופרים ויומת ומקצה שלשת ימים קום יקום:

³²והוא בגלוי דבר את הדבר הזה ויקחהו פטרוס ויחל לגער בו:

³³ויפן אחריו ויבט את תלמידיו ויגער בפטרוס לאמר סור מעל פני השטן כי אין לבך לדברי האלהים כי אם לדברי האדם:

³⁴ויקרא אל העם ואל תלמידיו ויאמר אליהם החפץ ללכת אחרי יכחש בנפשו וישא את צלבו וילך אחרי:

³⁵כי כל אשר יחפץ להושיע את נפשו תאבד נפשו ממנו וכל אשר תאבד לו נפשו למעני ולמען הבשורה הוא יושיענה:

³⁶כי מה יסכן לאדם כי יקנה את כל העולם ונשחתה נפשו:

³⁷או מה יתן איש פדיון נפשו:

³⁸כי כל איש אשר הייתי אני ודברי לו לחרפה בדור הנאף והחוטא הזה אף הוא יהיה לחרפה לבן האדם בבואו בכבוד אביו עם המלאכים הקדושים: