Salmos 21

¹למנצח מזמור לדוד יהוה בעזך ישמח מלך ובישועתך מה יגיל מאד:

²תאות לבו נתתה לו וארשת שפתיו בל מנעת סלה:

³כי תקדמנו ברכות טוב תשית לראשו עטרת פז:

⁴חיים שאל ממך נתתה לו ארך ימים עולם ועד:

⁵גדול כבודו בישועתך הוד והדר תשוה עליו:

⁶כי תשיתהו ברכות לעד תחדהו בשמחה את פניך:

⁷כי המלך בטח ביהוה ובחסד עליון בל ימוט:

⁸תמצא ידך לכל איביך ימינך תמצא שנאיך:

⁹תשיתמו כתנור אש לעת פניך יהוה באפו יבלעם ותאכלם אש:

¹⁰פרימו מארץ תאבד וזרעם מבני אדם:

¹¹כי נטו עליך רעה חשבו מזמה בל יוכלו:

¹²כי תשיתמו שכם במיתריך תכונן על פניהם:

¹³רומה יהוה בעזך נשירה ונזמרה גבורתך: