Ezequiel 10

¹וָאֶרְאֶה, וְהִנֵּה אֶל־הָרָקִיעַ אֲשֶׁר עַל־רֹאשׁ הַכְּרֻבִים, כְּאֶבֶן סַפִּיר, כְּמַרְאֵה דְּמוּת כִּסֵּא; נִרְאָה עֲלֵיהֶם׃

²וַיֹּאמֶר אֶל־הָאִישׁ לְבֻשׁ הַבַּדִּים, וַיֹּאמֶר בֹּא אֶל־בֵּינוֹת לַגַּלְגַּל אֶל־תַּחַת לַכְּרוּב, וּמַלֵּא חָפְנֶיךָ גַחֲלֵי־אֵשׁ מִבֵּינוֹת לַכְּרֻבִים, וּזְרֹק עַל־הָעִיר; וַיָּבֹא לְעֵינָי׃

³וְהַכְּרֻבִים, עֹמְדִים מִימִין לַבַּיִת בְּבֹאוֹ הָאִישׁ; וְהֶעָנָן מָלֵא, אֶת־הֶחָצֵר הַפְּנִימִית׃

⁴וַיָּרָם כְּבוֹד־יְהוָה מֵעַל הַכְּרוּב, עַל מִפְתַּן הַבָּיִת; וַיִּמָּלֵא הַבַּיִת אֶת־הֶעָנָן, וְהֶחָצֵר מָלְאָה, אֶת־נֹגַהּ כְּבוֹד יְהוָה׃

⁵וְקוֹל כַּנְפֵי הַכְּרוּבִים, נִשְׁמַע עַד־הֶחָצֵר הַחִיצֹנָה; כְּקוֹל אֵל־שַׁדַּי בְּדַבְּרוֹ׃

⁶וַיְהִי, בְּצַוֹּתוֹ אֶת־הָאִישׁ לְבֻשׁ־הַבַּדִּים לֵאמֹר, קַח אֵשׁ מִבֵּינוֹת לַגַּלְגַּל, מִבֵּינוֹת לַכְּרוּבִים; וַיָּבֹא וַיַּעֲמֹד, אֵצֶל הָאוֹפָן׃

⁷וַיִּשְׁלַח הַכְּרוּב אֶת־יָדוֹ מִבֵּינוֹת לַכְּרוּבִים, אֶל־הָאֵשׁ אֲשֶׁר בֵּינוֹת הַכְּרֻבִים, וַיִּשָּׂא וַיִּתֵּן, אֶל־חָפְנֵי לְבֻשׁ הַבַּדִּים; וַיִּקַּח וַיֵּצֵא׃

⁸וַיֵּרָא לַכְּרֻבִים; תַּבְנִית יַד־אָדָם, תַּחַת כַּנְפֵיהֶם׃

⁹וָאֶרְאֶה, וְהִנֵּה אַרְבָּעָה אוֹפַנִּים אֵצֶל הַכְּרוּבִים, אוֹפַן אֶחָד, אֵצֶל הַכְּרוּב אֶחָד, וְאוֹפַן אֶחָד, אֵצֶל הַכְּרוּב אֶחָד; וּמַרְאֵה הָאוֹפַנִּים, כְּעֵין אֶבֶן תַּרְשִׁישׁ׃

¹⁰וּמַרְאֵיהֶם, דְּמוּת אֶחָד לְאַרְבַּעְתָּם; כַּאֲשֶׁר יִהְיֶה הָאוֹפַן בְּתוֹךְ הָאוֹפָן׃

¹¹בְּלֶכְתָּם, אֶל־אַרְבַּעַת רִבְעֵיהֶם יֵלֵכוּ, לֹא יִסַּבּוּ בְּלֶכְתָּם; כִּי הַמָּקוֹם אֲשֶׁר־יִפְנֶה הָרֹאשׁ אַחֲרָיו יֵלֵכוּ, לֹא יִסַּבּוּ בְּלֶכְתָּם׃

¹²וְכָל־בְּשָׂרָם וְגַבֵּהֶם, וִידֵיהֶם וְכַנְפֵיהֶם; וְהָאוֹפַנִּים, מְלֵאִים עֵינַיִם סָבִיב, לְאַרְבַּעְתָּם אוֹפַנֵּיהֶם׃

¹³לָאוֹפַנִּים; לָהֶם קוֹרָא הַגַּלְגַּל בְּאָזְנָי׃

¹⁴וְאַרְבָּעָה פָנִים לְאֶחָד; פְּנֵי הָאֶחָד פְּנֵי הַכְּרוּב, וּפְנֵי הַשֵּׁנִי פְּנֵי אָדָם, וְהַשְּׁלִישִׁי פְּנֵי אַרְיֵה, וְהָרְבִיעִי פְּנֵי־נָשֶׁר׃

¹⁵וַיֵּרֹמּוּ הַכְּרוּבִים; הִיא הַחַיָּה, אֲשֶׁר רָאִיתִי בִּנְהַר־כְּבָר׃

¹⁶וּבְלֶכֶת הַכְּרוּבִים, יֵלְכוּ הָאוֹפַנִּים אֶצְלָם; וּבִשְׂאֵת הַכְּרוּבִים אֶת־כַּנְפֵיהֶם, לָרוּם מֵעַל הָאָרֶץ, לֹא־יִסַּבּוּ הָאוֹפַנִּים גַּם־הֵם מֵאֶצְלָם׃

¹⁷בְּעָמְדָם יַעֲמֹדוּ, וּבְרוֹמָם יֵרוֹמּוּ אוֹתָם; כִּי רוּחַ הַחַיָּה בָּהֶם׃

¹⁸וַיֵּצֵא כְּבוֹד יְהוָה, מֵעַל מִפְתַּן הַבָּיִת; וַיַּעֲמֹד עַל־הַכְּרוּבִים׃

¹⁹וַיִּשְׂאוּ הַכְּרוּבִים אֶת־כַּנְפֵיהֶם וַיֵּרוֹמּוּ מִן־הָאָרֶץ לְעֵינַי בְּצֵאתָם, וְהָאוֹפַנִּים לְעֻמָּתָם; וַיַּעֲמֹד, פֶּתַח שַׁעַר בֵּית־יְהוָה הַקַּדְמוֹנִי, וּכְבוֹד אֱלֹהֵי־יִשְׂרָאֵל עֲלֵיהֶם מִלְמָעְלָה׃

²⁰הִיא הַחַיָּה, אֲשֶׁר רָאִיתִי תַּחַת אֱלֹהֵי־יִשְׂרָאֵל בִּנְהַר־כְּבָר; וָאֵדַע כִּי כְרוּבִים הֵמָּה׃

²¹אַרְבָּעָה אַרְבָּעָה פָנִים לְאֶחָד, וְאַרְבַּע כְּנָפַיִם לְאֶחָד; וּדְמוּת יְדֵי אָדָם, תַּחַת כַּנְפֵיהֶם׃

²²וּדְמוּת פְּנֵיהֶם, הֵמָּה הַפָּנִים, אֲשֶׁר רָאִיתִי עַל־נְהַר־כְּבָר, מַרְאֵיהֶם וְאוֹתָם; אִישׁ אֶל־עֵבֶר פָּנָיו יֵלֵכוּ׃