Isaías 33

¹הוֹי שׁוֹדֵד, וְאַתָּה לֹא שָׁדוּד, וּבוֹגֵד וְלֹא־בָגְדוּ בוֹ; כַּהֲתִמְךָ שׁוֹדֵד תּוּשַּׁד, כַּנְּלֹתְךָ לִבְגֹּד יִבְגְּדוּ־בָךְ׃ ס

²יְהוָה חָנֵּנוּ לְךָ קִוִּינוּ; הֱיֵה זְרֹעָם לַבְּקָרִים, אַף־יְשׁוּעָתֵנוּ בְּעֵת צָרָה׃

³מִקּוֹל הָמוֹן, נָדְדוּ עַמִּים; מֵרוֹמְמֻתֶךָ, נָפְצוּ גּוֹיִם׃

⁴וְאֻסַּף שְׁלַלְכֶם, אֹסֶף הֶחָסִיל; כְּמַשַּׁק גֵּבִים שׁוֹקֵק בּוֹ׃

⁵נִשְׂגָּב יְהוָה, כִּי שֹׁכֵן מָרוֹם; מִלֵּא צִיּוֹן, מִשְׁפָּט וּצְדָקָה׃

⁶וְהָיָה אֱמוּנַת עִתֶּיךָ, חֹסֶן יְשׁוּעֹת חָכְמַת וָדָעַת; יִרְאַת יְהוָה הִיא אוֹצָרוֹ׃ ס

⁷הֵן אֶרְאֶלָּם, צָעֲקוּ חֻצָה; מַלְאֲכֵי שָׁלוֹם, מַר יִבְכָּיוּן׃

⁸נָשַׁמּוּ מְסִלּוֹת, שָׁבַת עֹבֵר אֹרַח; הֵפֵר בְּרִית מָאַס עָרִים, לֹא חָשַׁב אֱנוֹשׁ׃

⁹אָבַל אֻמְלְלָה אָרֶץ, הֶחְפִּיר לְבָנוֹן קָמַל; הָיָה הַשָּׁרוֹן כָּעֲרָבָה, וְנֹעֵר בָּשָׁן וְכַרְמֶל׃

¹⁰עַתָּה אָקוּם יֹאמַר יְהוָה; עַתָּה אֵרוֹמָם, עַתָּה אֶנָּשֵׂא׃

¹¹תַּהֲרוּ חֲשַׁשׁ תֵּלְדוּ קַשׁ; רוּחֲכֶם אֵשׁ תֹּאכַלְכֶם׃

¹²וְהָיוּ עַמִּים מִשְׂרְפוֹת שִׂיד; קוֹצִים כְּסוּחִים בָּאֵשׁ יִצַּתּוּ׃ ס

¹³שִׁמְעוּ רְחוֹקִים אֲשֶׁר עָשִׂיתִי; וּדְעוּ קְרוֹבִים גְּבֻרָתִי׃

¹⁴פָּחֲדוּ בְצִיּוֹן חַטָּאִים, אָחֲזָה רְעָדָה חֲנֵפִים; מִי יָגוּר לָנוּ, אֵשׁ אוֹכֵלָה, מִי־יָגוּר לָנוּ מוֹקְדֵי עוֹלָם׃

¹⁵הֹלֵךְ צְדָקוֹת, וְדֹבֵר מֵישָׁרִים; מֹאֵס בְּבֶצַע מַעֲשַׁקּוֹת, נֹעֵר כַּפָּיו מִתְּמֹךְ בַּשֹּׁחַד, אֹטֵם אָזְנוֹ מִשְּׁמֹעַ דָּמִים, וְעֹצֵם עֵינָיו מֵרְאוֹת בְּרָע׃

¹⁶הוּא מְרוֹמִים יִשְׁכֹּן, מְצָדוֹת סְלָעִים מִשְׂגַּבּוֹ; לַחְמוֹ נִתָּן, מֵימָיו נֶאֱמָנִים׃

¹⁷מֶלֶךְ בְּיָפְיוֹ תֶּחֱזֶינָה עֵינֶיךָ; תִּרְאֶינָה אֶרֶץ מַרְחַקִּים׃

¹⁸לִבְּךָ יֶהְגֶּה אֵימָה; אַיֵּה סֹפֵר אַיֵּה שֹׁקֵל, אַיֵּה סֹפֵר אֶת־הַמִּגְדָּלִים׃

¹⁹אֶת־עַם נוֹעָז לֹא תִרְאֶה; עַם עִמְקֵי שָׂפָה מִשְּׁמוֹעַ, נִלְעַג לָשׁוֹן אֵין בִּינָה׃

²⁰חֲזֵה צִיּוֹן, קִרְיַת מוֹעֲדֵנוּ; עֵינֶיךָ תִרְאֶינָה יְרוּשָׁלִַם נָוֶה שַׁאֲנָן, אֹהֶל בַּל־יִצְעָן בַּל־יִסַּע יְתֵדֹתָיו לָנֶצַח, וְכָל־חֲבָלָיו בַּל־יִנָּתֵקוּ׃

²¹כִּי אִם־שָׁם אַדִּיר יְהוָה לָנוּ, מְקוֹם־נְהָרִים יְאֹרִים רַחֲבֵי יָדָיִם; בַּל־תֵּלֶךְ בּוֹ אֳנִי־שַׁיִט, וְצִי אַדִּיר לֹא יַעַבְרֶנּוּ׃

²²כִּי יְהוָה שֹׁפְטֵנוּ, יְהוָה מְחֹקְקֵנוּ; יְהוָה מַלְכֵּנוּ הוּא יוֹשִׁיעֵנוּ׃

²³נִטְּשׁוּ חֲבָלָיִךְ; בַּל־יְחַזְּקוּ כֵן־תָּרְנָם בַּל־פָּרְשׂוּ נֵס, אָז חֻלַּק עַד־שָׁלָל מַרְבֶּה, פִּסְחִים בָּזְזוּ בַז׃

²⁴וּבַל־יֹאמַר שָׁכֵן חָלִיתִי; הָעָם הַיֹּשֵׁב בָּהּ נְשֻׂא עָוֹן׃