Provérbios 29

¹אִישׁ תּוֹכָחוֹת מַקְשֶׁה־עֹרֶף; פֶּתַע יִשָּׁבֵר, וְאֵין מַרְפֵּא׃

²בִּרְבוֹת צַדִּיקִים יִשְׂמַח הָעָם; וּבִמְשֹׁל רָשָׁע, יֵאָנַח עָם׃

³אִישׁ־אֹהֵב חָכְמָה יְשַׂמַּח אָבִיו; וְרֹעֶה זוֹנוֹת, יְאַבֶּד־הוֹן׃

⁴מֶלֶךְ, בְּמִשְׁפָּט יַעֲמִיד אָרֶץ; וְאִישׁ תְּרוּמוֹת יֶהֶרְסֶנָּה׃

⁵גֶּבֶר מַחֲלִיק עַל־רֵעֵהוּ; רֶשֶׁת, פּוֹרֵשׂ עַל־פְּעָמָיו׃

⁶בְּפֶשַׁע אִישׁ רָע מוֹקֵשׁ; וְצַדִּיק, יָרוּן וְשָׂמֵחַ׃

⁷יֹדֵעַ צַדִּיק דִּין דַּלִּים; רָשָׁע, לֹא־יָבִין דָּעַת׃

⁸אַנְשֵׁי לָצוֹן יָפִיחוּ קִרְיָה; וַחֲכָמִים, יָשִׁיבוּ אָף׃

⁹אִישׁ־חָכָם, נִשְׁפָּט אֶת־אִישׁ אֱוִיל; וְרָגַז וְשָׂחַק, וְאֵין נָחַת׃

¹⁰אַנְשֵׁי דָמִים יִשְׂנְאוּ־תָם; וִישָׁרִים, יְבַקְשׁוּ נַפְשׁוֹ׃

¹¹כָּל־רוּחוֹ יוֹצִיא כְסִיל; וְחָכָם, בְּאָחוֹר יְשַׁבְּחֶנָּה׃

¹²מֹשֵׁל מַקְשִׁיב עַל־דְּבַר־שָׁקֶר; כָּל־מְשָׁרְתָיו רְשָׁעִים׃

¹³רָשׁ וְאִישׁ תְּכָכִים נִפְגָּשׁוּ; מֵאִיר־עֵינֵי שְׁנֵיהֶם יְהוָה׃

¹⁴מֶלֶךְ שׁוֹפֵט בֶּאֱמֶת דַּלִּים; כִּסְאוֹ, לָעַד יִכּוֹן׃

¹⁵שֵׁבֶט וְתוֹכַחַת יִתֵּן חָכְמָה; וְנַעַר מְשֻׁלָּח, מֵבִישׁ אִמּוֹ׃

¹⁶בִּרְבוֹת רְשָׁעִים יִרְבֶּה־פָּשַׁע; וְצַדִּיקִים, בְּמַפַּלְתָּם יִרְאוּ׃

¹⁷יַסֵּר בִּנְךָ וִינִיחֶךָ; וְיִתֵּן מַעֲדַנִּים לְנַפְשֶׁךָ׃ פ

¹⁸בְּאֵין חָזוֹן יִפָּרַע עָם; וְשֹׁמֵר תּוֹרָה אַשְׁרֵהוּ׃

¹⁹בִּדְבָרִים לֹא־יִוָּסֶר עָבֶד; כִּי־יָבִין, וְאֵין מַעֲנֶה׃

²⁰חָזִיתָ, אִישׁ אָץ בִּדְבָרָיו; תִּקְוָה לִכְסִיל מִמֶּנּוּ׃

²¹מְפַנֵּק מִנֹּעַר עַבְדּוֹ; וְאַחֲרִיתוֹ, יִהְיֶה מָנוֹן׃

²²אִישׁ־אַף יְגָרֶה מָדוֹן; וּבַעַל חֵמָה רַב־פָּשַׁע׃

²³גַּאֲוַת אָדָם תַּשְׁפִּילֶנּוּ; וּשְׁפַל־רוּחַ, יִתְמֹךְ כָּבוֹד׃

²⁴חוֹלֵק עִם־גַּנָּב שׂוֹנֵא נַפְשׁוֹ; אָלָה יִשְׁמַע, וְלֹא יַגִּיד׃

²⁵חֶרְדַּת אָדָם יִתֵּן מוֹקֵשׁ; וּבוֹטֵחַ בַּיהוָה יְשֻׂגָּב׃

²⁶רַבִּים מְבַקְשִׁים פְּנֵי־מוֹשֵׁל; וּמֵיְהוָה, מִשְׁפַּט־אִישׁ׃

²⁷תּוֹעֲבַת צַדִּיקִים אִישׁ עָוֶל; וְתוֹעֲבַת רָשָׁע יְשַׁר־דָּרֶךְ׃ פ